Главная > Марий Эл Радио > Марий кундемын лӱмло сӱретчыже Измаил Ефимовын произведенийже-влакым аклаш лиеш

Марий кундемын лӱмло сӱретчыже Измаил Ефимовын произведенийже-влакым аклаш лиеш


15:50, 3-09-2021. Разместил: zhannk

Марий кундемын лӱмло сӱретчыже Измаил Ефимовын произведенийже-влакым аклаш лиеш. Ончер Республикысе сӱрет сымыктыш тоштерыште почылтеш, тушко музейын фондшо гыч лукмо живопись ден графике жанрыште ямдылыме радынаже-влакым вераҥдат. Толшо-влак сӱретчын ийла дене вашталтме стилистикыжым ужын кертыт. Мутлан, кодшо курымын 70-шо ийлаштыже мастар еҥ утларакше курыкмарий калыкын историйжым, илыш-йӱлажым почын пуэн. Тудо шочмо вер-шӧржым мокта да шке калыкшын чонжым, кумыжым шижын мошта. 21 курым тӱҥалтыште Измаил Варсонофьевич этнофутуризм стильыште тыршаш тӱналын. Сӱретче пашаштыже у шонымашым, у темым, у йӧн-влакым кычалеш. Тыге, ынде ятыр ий Измаил Ефимов тӱрлӧ жанрыште оҥай да шонаш таратыше паша-влакым шочыкта. Измаил Ефимов – Российын сулло да Марий Элын калык сӱретчыже, МАССР кугыжаныш премийын лауреатше, Российысе художество академийын почетан еҥже. Тыгак Марий Эл Кугыжаныш гербын, тистын, штандартын, кугыжаныш да моло награде-влакын авторжо. Марий сӱретче эре уым кычалеш, радынаштыже кажне изи настам шке семынже шонен ышта да сӧрастара. Мастарын произведенийже-влак Россий, Финляндий, Испаний, Венгрий, Эстоний, Швейцарийысе тоштер коллекцийыште аралалтыт. Тудо кажне илыш ярымыштыже оҥай пашаж дене тӱрлӧ вере чапланен. 


Вернуться назад