Йошкар-Олаште вич ийыште «Оласе йӧнан средам ыштымаш» федерал проект дене келшышын 21 кумдыкым тӱзатеныт

Йошкар-Олаште вич ийыште «Оласе йӧнан средам ыштымаш» федерал проект дене келшышын 21 кумдыкым тӱзатеныт. Тиде программе дене Тазалык аллей, Сеҥымаш парк, Чавайн бульвар, Свирин лӱмеш да Глезденев лӱмеш сквер-влак у тӱсым налыныт. Ушештарена, тений еҥ-влак российысе платформышто проект-влак верч йӱкленыт, шым проект эн шуко йӱкым поген, нуным вес ийын тӱзаташ тӱҥалыт. Тиде радамыште Димитровский парк. Проектын икымше этапыштыже йолешке-влаклан да велосипед дене кудалыштше-влаклан корным ыштат, барбекю зоным, автомашинам шогалташ верым, контейнер площадкым келыштарат. Тидын дене пырля паркыште пушеҥге, вондерым шындат, изирак архитектур формым вераҥдат. План дене пашам 2022 ий 1 апрельыште тӱҥалшаш улыт.