«Сылнымут аршаш» конкурсым иктешлыме

Кажне ийын Йошкар-Оласе туныктыш виктем «Сылнымут аршаш» конкурсым увертара. Тудо Марий тиште кечылан пӧлеклалтеш да 29-ше номеран марий йочасад пелен эрта.   Йоча-влакым конкурслан ямдылымаште воспитатель да ача-ава-влак моткоч тыршат. Конкурсыш 3 гыч 7 ияш марте кажне йочасад гыч ик участник ушнен кертеш. Тений ынде кокымшо гана поэзий таҥасымаш онлайн йӧн дене эртен. Чылаже 36 йодмаш пурен. 3 гыч 5 ияш марте ийготан-влак коклаште эн ямлын лудшо семын Владимир Петуховым ойыреныт. Тудо 37-ше номеран йочасадыш коштеш. Кокымшо верыште – 64-ше йочасад гыч Илиза Габдуллина, кумшо верыште – 5-ше номеран йочасад гыч Арина Александрова. Вес сылнымут толкын 5 гыч 7 ияш марте участник-влакым ушен. Икымше верыш 80-ше номеран йочасад гыч Анастасия Поликарпова лектын. Кокымшо верыште – 51-ше йочасад гыч Таисия Ялаева, кумшо верыште – 21-ше йосадын воспитанникше Рамир Газитов.