3 гыч 7 ияш марте йоча-влаклан социал полышым налаш йодмашым «Госуслуги» портал гоч пуаш лиеш

3 гыч 7 ияш марте йоча-влаклан социал полышым налаш йодмашым «Госуслуги» портал гоч пуаш лиеш. Тыгодым нимогай справкым погыман огыл. «Госуслуги» портал гыч йодмаш пурымеке, тудым оласе да районысо социал рӱдерышке колтат. Тушто тӱрлӧ учреждений да ведомство гыч документ-влакым погаш тӱҥалыт: пенсий фонд, налог службо, социал страховний фонд, паша департамент, обороно министерстве, элкӧргӧ министерстве, судебный пристав-влак службо да молат. Кажне ешлан посна документ-влак. Ача, ава да ик йоча гыч шогышо ешлан специалист 8 тӱрлӧ инстанцийышке 24 йодмашым колта. Тиде кужу жапым налын кертеш. Тидын шотышо Социал вияҥмаш министр республикыште кугыжаныш портал гоч йодмашым пуышо-влакым тидым умылаш темла. Пытартыш жапыште документым кужун ончымо шотышто министерствышке да вес ведомствылашке ятыр вуйшиймаш пура. Специалист-влак нуныланат жапыштыже вашештышаш улыт. Тыгодым «Кугыжаныш услуго» порталыште йодмашым возымо годымат тӱткӧ лийыман. Технический йоҥылышлан кӧра, южгунам специалист-влак тудым ончен огыт керт. Ушештарена, Россий Президент, коронавируслан кӧра, 3 гыч 7 ияш марте йоча-влаклан кажне тылзын пуымо пособийым тӱлаш постановленийым пеҥгыдемден. Тудым ешын парышыжым ончен пуат. Марий Элыште пособий кугыт 5000 теҥгешке шуэш. Ешын парышыже кажне еҥлан шотлымаште 9 тӱжем теҥге дечын шуко лийшаш огыл.