Марий кундем гыч абитурент-влак врачлан целевой направлений дене икмыняр вере тунемаш тӱҥалыт

Марий кундем гыч абитурент-влак врачлан целевой направлений дене Киров, Ижевск да Марий кугыжаныш университетыште тунемаш тӱҥалыт. Тазалыкаралтыш министерстве целевой направлений дене 148 ойпидышым ыштен. Эн шуко вер «Лечебное дело» специальностьышко - 45, «Педиатрийышке» - 30 вер, «Стоматологий» специальностьышко 3 вер, 2 вер – «Медицинская биохимия» направлений дене. Тений Россий ВУЗлаште 108 еҥ республике дечын целевой направлений дене врачлан тунемын пытарен, ординатурым пытарен 38 специалист толшаш. Йошкар-Оласе медицин колледжым тений 285 ӱдыр-рвезе пытарен гын, 238 – бюджет верыште шинчымашым погеныт.