Марий Элыште йот эл гыч толшо-влак коронавируслан тергалтшаш улыт

Мемнан республикыште йот эл гыч толшо-влак коронавируслан тергалтшаш улыт. Тидын шотышто Марий Элын Тазалыкаралтыш министерстве улшо приказышке ешартышым пуртен. Вес эл гыч толшо мемнан кудемыште пашам ышташ але тунемаш шона гын, медицин тергымаш дечын ончыч коронавируслан тестым ыштышаш.  Каласен кодаш лиеш, Российыште вес элла гыч толшо-влаклан кок арняш карантиным чареныт. Тыгодым кажныжын отрицательный тестшын иктешлымашыже пеленже лийшаш, але толмекыже, кум кече жапыште, мемнан элыште ыштен шуктышаш.