Тошто книга-влакым электрон форматышке кусарат

С.Чавайн лӱмеш библиотеке книга памятниклан шотлалтше 60 савыктышым цифроватла. Тиде пашам «Культура» национальный проектын «Цифровая культура» проектше дене ыштат. Тошто книга-влак коклашке кид дене возымо, 18-19 курымышто савыктыме, марий йылме дене лекше икымше книга-влак. С.Чавайн лӱмеш книгагудын 140 ияш историйыштыже тыгайже ятыр погынен. Нуно историй факт, культур поянлык семын моткоч чот шергакан улыт. Кодшо ийын улшо план дене 1766 ийыште лукмо Михаил Ломоносовын сочиненийже-влакым, 1775 ийыште савыктыме В.Г.Пуцек-Григоровичын «Сочинения, принадлежащие к грамматике черемисского языка» да эше икмыняр книгам цифроватленыт. Книга памятник-влакым электрон формышко кусареныт, тудын дене библиотекыште пайдаланаш лиеш, икмыняр жап гыч нуным «Национальная электронная библиотека» федерал кӱкшытан кугыжаныш-информационный системышке пуат.