Волжский районысо школлаште, 1 сентябрь гыч, тӱҥалтыш класслаште тунемше йоча-влакым яра пукшаш чыла ямде

Волжский районысо школлаште 1 сентябрь гыч тӱҥалтыш класслаште йоча-влакым яра пукшаш чыла ямде. Тидын нерген район администраций увертара. Волжский районышто школ-влакын пищеблокыштым ямдылаш 1 миллион утларак ойыралтын. Таче кечылан чыла 10 тунемме верыште паша шукталтын. Икмыняр школышко у оборудованийым налыныт. Роспотребнадзорын специалистше-влак пищеблок да столовый-влакын  у тунемме ийлан ямде улмыштым тергат. Россий Президентын кӱштымашыже дене тений 1 сентябрь гыч тӱҥалтыш класслаште шинчымашым погышо-влак яра кочкаш тӱҥалыт. Республикысе бюджет гыч тидлан 22 миллион наре ойыралтын.