Версия для печати > Юрий Зайцев Парламент партийысе еҥ-влак дене вашлийын

Марий Эл Республикын вуйлатышыже сомылым жаплан шуктышо Юрий Зайцев Парламент партийысе еҥ-влак дене вашлийын. Тудо палемден, айдемым тудо партий шот дене ок ойыркале, кеч-могай партий кундемнан тӱзатыме, тудым вияҥдыме верч тырша гын – кугыжаныш могырым эре сай вашкылым муэш. «ЛДПР» партий деч Антон Мирабадалев дене вашлийме годым, тӱҥ шотышто, экологий йодышым каҥашеныт гын, «Справедливая Россия – Патриоты-За правду» партийын еҥже Наталья Глущенко Йошкар-Оласе вокзалым тошто полатышкыжак пӧртылташ кӱлмӧ нерген мутым луктын, Марий Элыш «Новые люди» партий деч Кугыжаныш Думын депутатше Сардана Авксентьева толын коштын. Тудын дене вашмутланыме годым гын, амалкалымаш пашам вораҥдараш кӱлмӧ, самырык-влаклан чын корно дене каяш йӧным ышташ кӱлмӧ нерген каҥашеныт. Сардана Авксентьева палемден – ик ий Кугыжаныш Думышто лийме жапыште уло Российыште регион-влакым вуйлатыше-влак кокла гыч Юрий Зайцев дене тудо икымше гана вашлийын. Российысе депутат Юрий Викторовичлан порын вашлийын, чыла йодышым пырля каҥашаш кумылан улмыжлан таум каласен.