Марий Элын тулпатырже-влак кокла гыч эн сайжым ойыреныт

Марий Элын тулпатырже-влак кокла гыч эн сайжым ойыреныт. Кундемысе МЧС виктемыште тыршыше-влак кокла гыч эн сай караул вуйлатышым, эн сай тулпатырым, да пожар аралтышын эн сай пашаеҥжым палемденыт. Тиде конкурс Пемба поселкышто эртен. Ӱчашымаште шке часть ден отрядлаште ончыл верыш лекше утарыше-влак таҥасеныт. Ӱчашыше-влакын эн ондак уш-акылыштым тергеныт, а варажым практике могырымат ончалынат. Нуно шке капыштым нӧлтеныт, спасательный оҥгым пидыныт, куржталыныт да тулеч-молат. «Пожар аралтышын эн сай пашаеҥже» ден «Эн сай тулпатыр» номинацийлаште 6-шо пожар-утарыше частьын пожарныйже Николай Новоселов, да тыгак специализированный пожар-утарыше частьын мастер-пожарныйже Геннадий Волков сеҥеныт. Нуно коктынат Йошкар-Олаште пашам ыштат. Эн сай пожар аралтыш пашаеҥ чаплӱм ден Волжск оласе 12-шо пожар-утарыше частьыште тыршыше Константин Ашкельдин суапландаралтын. Сеҥыше-влаклан диплом ден кубокым кучыктеныт.