Главная > Марий Эл Радио > Морко кундемыште марий просветитель Гавриил Яковлевым шарныме пайрем-погынымаш эртаралтын

Морко кундемыште марий просветитель Гавриил Яковлевым шарныме пайрем-погынымаш эртаралтын


14:03, 23-11-2022. Разместил: zhannk

Морко кундемыште марий просветитель Гавриил Яковлевым шарныме пайрем-погынымаш эртаралтын. Марий букварьын авторжо Курыкмарий кундемыште 1843 ийыште шочын. Марий просветитель семын ятыр шымлыме пашам возен, черке книга-влакым кусарен, черкыште службым эртарен. Унчо, Арын кундемлаште школым ышташ полшен. Сотемдарче 21 ноябрьыште 1912 ийыште черланыме деч вара колен. Тений тудын уке улмыжлан 110 ий. Тиде кечын Арын черкыште тудым шарнен, «Сотемдарче Гавриил Яковлевын кышаже почеш» йыргешке ӱстел лийын, МарНИИ-н пашаеҥже, историк-влак докладым ыштеныт, Арын школын тунемшыже-влак сотемдарчын илыш корныж нерген каласкаленыт, почеламутым лудыныт, артист-влак мурым йоҥгалтареныт. Гавриил Яковлев марий кундемыште грамотностьым шарен. Тудын тунемшыже-влак коклаште Тихон Ефремовым, моло просветитель-влакым палемдаш лиеш.  Тудын ӱдыржӧ Елизавета – ачажын пашажым шуэн, Арын кундемыште марий йоча-влакым туныктымылан кугу полышым пуэн.  Гавриил Яковлевын  ямдылыме букварь-влакым икмыняр гана савыктеныт. Икманаш, марий просветитель, книгам лукмаште, йоча-влакым туныктымаште веле огыл тыршен, тыгак марий калыкын чонышкыжо ӱшаным пыштен. Марий кундемыште марий йоча-влак тунемышт, шинчымашым погышт манын кугу, поро суап пашам шуктен. Тачысе кечынат Морко районысо Арын кундемыште веле огыл, марий кундемыштат просветительым шарнат да тудын пашажым шуят. Арын черкыште тачысе кечын кажне шуматкечын Юмын литургийым марла эртарат. 


Вернуться назад