Главная > Марий Эл Радио > Кукнур селаште Йӱштӧ Кугызан илемжым телылан ямдылат

Кукнур селаште Йӱштӧ Кугызан илемжым телылан ямдылат


14:58, 11-08-2020. Разместил: zhannk

Шернур район Кукнур селаште Йӱштӧ Кугызан илемжым телылан ямдылат. Районысо рӱдӧ клуб системын методике пӧлкан полшымыжо дене икмыняр проектым возен, сеҥеныт. Ик   проект дене шун гыч тӱрлӧ сувенирым ышташ шонат, кокымшо проект - Йӱштӧ Кугызан илемже ончылно печым да капкам чоҥаш , кумшо проект –  Йуштӧ Кугыза-влакын фестивальже. Кызыт тӱвыра пашаеҥ-влак печым ыштат. Пашам июнь тылзыште тӱҥалыныт. Печын кужытшо 90 метр, тудым пу гыч чоҥат. Пашаеҥ-влак тудым пелганде тӱсышко чиялтеныт, лишыл жапыште марий тӱсым пуртен, сылнештарат. Лишыл жапыште капкам ышташ тӱҥалыт. Тудым Кукнур кундемын кидмастарже Войкин Сергейын полшымыжо дене шогалтат. Тиде пашам сентябрьын кокымшо пелыштыже пытарышаш улыт. Йӱштӧ Кугызан печыжым кундемысе туризмым вияҥдаш республике вуйлатышын грант дене шуктат. Йӱштӧ Кугызан илемжым икмыняр ий тӱзаташ тӱҥалыт. Ончыкылык шонымаш дене йоча-влаклан модаш верым чоҥаш, «Йуштӧ Кугызан юзо корныжо» программым уэмдаш. Теле тӱҥалтыште Кукнур селаште Йӱштӧ Кугыза-влакын фестивальже лийшаш. Тудланат пашаеҥ-влак ончылгоч ямдылалтыт: сценым чоҥаш, програмымым ышташ тӱҥалыт. 


Вернуться назад