У микрорайоным чоҥымо годым, йочасад да школ нерген мондыман огыл

У микрорайоным  чоҥымо годым, йочасад да школ нерген мондыман огыл. 

Регион вуйлатыше А.Евстифеев тиде ойым ола мучко эртыме годым ойлен. Ты гана Йошкар-Ола кумдыкым комплексно вияҥдыме ойпидыш дене йочасадым ыштыме йодышым нӧлталыныт. Регион вуйлатыше икмыняр вере лийын. Нине верлаште арендатор-влак йочасадым чоҥышыш, вара мунициапал да кугыжаныш погышко кусарышаш улыт ыле. Таче кече марте ик социал объектымат чоҥымо огыл. А.Евстифеев «Фестивальный»микрорайонышто лийын, тушто кок йочасадым чоҥышаш улыт ыле, кажныже 180 верлан. Тыгодым йочасад нерген мондалтын. Марий Эл вуйлатыше ола мучко эртыме годым, Западный, Йыван Кырля, Черняков, Мышино урем кокласе кумдыкышто лийын. Александр Евстифеев кажне этапыште объектым чоҥышо-влакын ыштышаш пашаштым шотышто кучаш темлен. Чоҥымаш министерствын вуйлатышыже палемден: «Ынде чоҥышо-влакым тидын шотышто пеҥгыдынрак тергаш тӱҥалыт». Козьмодемьянский тракт да Черняков урем коклаште тыгак 320 верлан йочасад да 1300 верлан школым ыштышаш улыт. Таче кечын социал объектым огыт ыште. Йочасадым чоҥаш эше ик вер 9 «Б» микрорайонышто лийшаш. Тыште тудо кӱлеш, тудым ыштыме жапым кӱчыкемдыман. Тидын нерген вуйлатыше ӱшандарен ойлен. 

Таче кечын Йошкар-Олаште 66 йочасад уло, тушко 16 тӱжем утла йоча коштеш. Идалык мучаш марте Йошкар-Олаште 640 верым ыштат. Молодежный да 9В микрорайонышто йочасадым чоҥат. «Демографий» нацпроект дене Восточный да Интеграл микрорайонышто да 49 номеран йочасад деке пристройым йыштымеке вер ешаралтын. 1 сентябрьыште Йошкар-Олаште 31 номеран школ почылтеш, тушто 825 йоча шинчымашым погаш тӱҥалеш.