Версия для печати > Йошкар-Оласе индешымше микрорайонышто хоккей площадкым тӱзатат

Йошкар-Оласе индешымше микрорайонышто хоккей площадкым тӱзатат. Тудо 27 номеран школ шеҥгелне верланен. Пашам Юрий Зайцевын кӱштымашыже почеш эше кодшо ийын тӱҥалыныт. Рӱдӧ олан мэрын икымше алмаштышыже Лев Покровский палдара: кызыт ончыкылык хоккей площадкым уэмдат. Пашаеҥ-влак тошто печым пуженыт, шӱк-куштырам кораҥденыт, тошто асфальтым уэмденыт, ешартыш понарым вераҥденыт. Ончыкыжым тушто телым хоккей площадке лиеш, а кеҥежым футбол дене модаш верым келыштарат.