17 еҥын коронавирус пеҥгыдемдалтын

Марий Элыште кажне кечын коронавирус дене черланыше еҥ-влак тиде шучко черым сеҥат. Тидын годым инфекционный стационарлаште эмлалтше-влакын чотшо огеш шагалем, пытартыш кечылаште шукемеш веле. Таче кечын коронавирус але тудын лийын кертме лӱдыкшӧ дене стационарыште 370 утла еҥ эмлалтеш. Шуко еҥын пневмоний. Пандемий тӱҥалме дечын вара республикыште 40 утла еҥ тиде черлан кӧра ӱмыр лугыч лийын. Кече еда специалист-влак 15-17 еҥлан «коронавирус» диганозым шындат. Тачысе эрлан 17 еҥын тиде диагноз пеҥгыдемдалтын. Стационарлаште 374 еҥ эмлалтеш. Тиде инфекций йоча-влак декат пижеш. Тидым шотышко налын, санитар врач-влак школлаште тазалык урокым эртарат. Республикын тӱҥ эпидемиологшо Светлана Булатова рӱдоласе ик школышто лийын. Тудо йоча-влаклан тиде инфекцийын профилактике да тудын дечын аралалтме нерген ойлен. Эпидемиолог-влак эн ончыч кидым шовын дене сайын мушкаш темлат. Кокымшо – тӱшка верлаште дистанцийым эскерыман. Маске нергенат мондыман огыл: транспорт, кевыт, аптекыште тудым чийыман.