Кодшо ийын Марий Элыште IT-компаний-влакын ыштен налме парышышт 6 миллиард теҥгешке шуын. Тачысе кечын Йошкар-Олаште 130 утла IT-компаний пашам ышта. Нунын гыч ик эн кугу компаний-влакым «Россия» выставке форумышто ончыктеныт. Марий кундемыште ты отрасльын вияҥмыже нерген Правительстве председательын алмаштышыже Дмитрий Троицкий палдарен. Тудо ешарен, мемнан кундемысе IT-продукт-влак Российыште веле огыл, тыгак йот элыштат йодмашан улыт. Ты сферыште республикыште кадр чӱдылык уке.