Медведево районышто у йочасад почылтын

Медведево районышто «Семицветик» лӱман у йочасад почылтын. Тушко 320 йоча кошташ тӱҥалеш. Нуным 13 группышко чумырат. У йочасадым пайремлын почмаште регион вуйлатыше А.Евстифеев лийын. Республике правительстве у объект-влак ыштымым тӱткышыштӧ куча. Тидлан «Демографий» нацпроект полшын ышта. Кодшо ийын гына 6 йочасадым почыныт, тушто 1165 вер ышталтын. Тений республикыште 1010 верым ыштат. Медведево районыштак, Чехов уремыште, 100 верлан йочасадым ышташ тӱҥалыныт, нылымше кварталыште Руэм поселкышто ышташ тӱҥалыт. Тыгак Медведево поселкышто 825 верлан школым ыштат. Александр Евстифеев йочасадын заведующийже Светлана Данилова дене пырля охранын пӧлемыштыже лийын. Тушто йыр улшо кумдыкым видеоэскерымаш уло, тыгак группо, модмо пӧлем, медицин блок, спортзал. Тиде проект 198 млн теҥггешке шуын. Тачысе кечылан у йочасадышке верым шеледыме, тудым ыштыме годым пожар лӱдыкшыдымылык правилым шотышко налыныт да тазалык дене эмганен вияҥше-влакланат келыштареныт. Тений республикыште Молодежный да Прохоров уремлаште 320 верлан кок йочасадым ыштен шуктышаш улыт, август тылзыште Медведево поселкысо Чехов уремыште у йочасадым негызленыт, тений тыгак Йошкар-Олан Мирный микрорайонышто 320 верлан йочасадым ышташ тӱҥалыт, тыгак Руэм поселкышто 100 верлан йочасадым. Вес ийын Медведево районысо Нурма селаште йоча тӧнежым ыштышаш улыт.