Марий Элыште санитарный авиацийын вертолётшо икымше пациентым Козьмодемьянск гыч Йошкар-Олашке конден

Марий Элыште санитарный авиацийын вертолётше икымше пациентым Козьмодемьянск гыч Йошкар-Олашке конден. Юл эҥер серысе ола гыч эмганышылан республикысе клинический больницыште операцийым ыштеныт. Марий Эл Республикыште авиационный услуго-влакым «Здравоохранений» национальный проектын первичный медицин-санитар полышым вияҥдыме программе дене шуктат. Тидлан «Русские вертолетные системы» акционер ушем дене контрактым ыштеныт. Козьмодемьянск гыч республикын рӱдӧ олашкыже пациентым 35-40 минут жапыште конден шуктеныт. Автотранспорт дене тидлан 2-3 шагат кӱлеш ыле. Тыгодым сусыргышо да эмганышым вертолёт дене утларак лӱдыкшыдымын кондыштарен шукташ лиеш.   Санитар авиаций экстренно полыш кӱлмӧ годым еҥын илышыжым арален кодаш полша. Вертолётышто кӱлеш медицин оборудований уло, а тудо транспортировко годымат интенсивный терапий да реанимацийым ышташ полша.