Мемнан республикыште пытартыш ийлаште автомашина корнын качествыже палынак саемын.Тиде показатель дене Марий Эл ‒ Российын 5 ончыл регионжо радамыште. Тидын годым корно туткар-влакын чотышт огеш шагалем. Тений 9 тылзыште республикыште 500 утла ДТП ышталтын, аварийлаште еҥ-влакат ӱмыр лугыч лийыт. Мемнан кундемыште фото да видеофиксаций комплекс-влак шукемыт.
Корно туткарын профилактикыжлан пӧлеклалтше совещанийым Правительстве пӧртыштӧ Марий Элын Вуйлатышыже Юрий Зайцев эртарен. Школышто тунемше-влак денат, автомашинам виктарыше-шамыч денат профилактике да умылтарымаш пашам эше шукырак эртараш темленыт.
(Фотом Марий Элысе Виктерын сайтше гыч налме)