Марий Элыште шочшо йоча-влаклан арверым жаплан пуымо пункт-влакым почыт. Тидын шотышто приказым Марий Элын Паша да социал аралтыш министерствыже савыктен. Тыгай пункт-влак олаште да районлаште социал аралтыш рӱдер пелен пашам ышташ тӱҥалыт. Тушто еш-влаклан коляске, кровать, йочам пукшаш пӱкен, ходунки, манеж да молымат пуаш тӱҥалыт. Нунын дене 35 ияш марте ача-ава-влак, студент еш, тыгак икшывым шкетын ончышо ача але ава пайдаланен кертыт.