Марий Элыште чодыра-влакым пожар дечын аралаш 80 миллион теҥгем ойыреныт. Регион вуйлатыше Юрий Зайцев чрезвычайный ситуацийым шижтарыме шотышто заседанийым эртарен.
Тений лум эр шулен пытымылан кӧра, пожар лийын кертме лӱдыкшӧ жап кок арнялан ончычрак тӱҥалын. Кызыт тӱҥжӧ ‒ профилактике – палдарен Юрий Зайцев.
Тений тиде пашалан 2750 еҥ, 585 единицие технике да 2400 утла единице оборудований ямде. 70% тулазап еҥ-влакын тулым эскерыде кучылтмыштлан кӧра тӱҥалеш. Чодыра фондым шекланаш наблюдательный пункт-влак улыт, тыгак 14 видеокамерым вераҥденыт.
Икымше чодыра пожар тений 4 апрельыште Звенигово районышто ылыжын. 21 апрель гыч регионышто пожар ваштареш режимым увертарат.