Тунемме верлаште йоча-влак дене почмо урок, конкурс, тӱрлӧ мероприятий лийыт. Мемнан кундем IT-специалист-влакым ик эн сайын ямдылыше регион семын палыме. Кодшо ийын гына бюджет верлаш 1000 утла ончыкылык специалист тунемаш толын. Тыгак кокла тунемме шинчымашым пуышо тӧнежлаш 300 наре еҥ. Кадрым школ гычак ямдылат. 100 утла школышто «Алгоритимика» платформышто 3 тӱжемат 500 утла тунемше программированийлан кумылаҥеш.
Тений «Цифровая экономика» нацпроект дене, «Код будущего» проект дене кугурак класслаште тунемше да студент-влак шинчымашым налаш тӱҥалын. Школлаште «IT-куб» сынан 4 рӱдер да 6 «Кванториум» уло, тыгак «Точка роста» лӱман 105 рӱдерыште икшыве-влак графический дизайн да моделированийлан тунемыт. У тунемме идалыкыште 17 школ да колледжыште пилотдымо авиаций системым туныкташ тӱҥалыныт, тидлан кӱлеш оборудованийым налыныт.