Российысе просвещений министерстве, «Знание» общество да Российысе йоча рӱдер ача-ава комитетын Россий кӱкшытан икымше съездым эртареныт.
Российысе 89 регион гыч 600 участникым ушышо ача-ава комитетын Россий кӱкшытан икымше съездышт 18 ноябрьыште Москосо пионер полатыште мучашлалтын. Программе элнан эн чолга ача-ава-влакын ыштыме пашаштым иктешлаш да туныктымо процессыште умбакыже пырля пашам ыштыме планым палемдаш эртаралтын. Съезд опыт ден пайлалташ, школлаште воспитаний системын ончыкылыкшо нерген каҥашаш йӧршӧ площадкыш савырнен.