Регион вуйлатыше Юрий Зайцев кугыжаныш программе, нацпроект, республикын социал-экономике могырым вияҥмаш шотышто индивидуальный программын шукталтмыже нерген совещанийым эртарен.
Промышленность, экономике вияҥмаш да ужалымаш министр Владимир Халюзин палдарен, тений 29 кугыжаныш программылан федерал да республикысе бюджет гыч 66 миллиард теҥге ойыралтеш.
Юрино поселкышто пассажир причалым чоҥаш 151 миллион теҥге палемдалтеш, туризм сферыште тыгак модульный средстве-влакым (глэмпингым) чоҥат, Йошкар-Олан турист рӱдержым тӱзатат, российысе да тӱнямбал выставкылаште республике нерген палдараш шийвундо ойыралтеш.
«Развитие промышленности и повышение ее конкурентоспособности» программым илышыш пурташ 125 миллион теҥге палемдалтеш. Тиде окса дене промышленный предприятий-влак у оборудованийым налыт, тыгак изирак да кокла предпринимательствылан полыш лиеш. Верысе инициативылан 141 миллион теҥге кая.