Тидлан вич локаций лиеш: Оболенский-Ноготков лӱмеш площадь воктене Палантай гыч Ленинский проспект марте, Ленин площадьыште, Вознесенский уремыште, Курчак театр воктене Царьградский проспектыште, тыгак Чарла Кремль воктене. Тидлан шошым лӱмын знак-влакым вераҥдат, тудо жап марте парковко-влак яра лийыт. Антон Трудинов палдарен, кызыт рӱдолаште парковочный сервисым налыт. Тудо Российын шуко олаштыже пашам ышта. Чыла парковкылаште фото да видеофикаций лийыт.
Турист автобус-влак ик суткалан 300 теҥгем тӱлаш тӱҥалыт. Таҥастараш гын, Нижний Новгород олаште турист автобус-влаклан парковко 612 теҥге, Воронеж да Суздальыште 400 тенге, Казаньыште тариф шагат дене шотлалтеш.