Петров уремым да Шернур трактым вес ийын у корно уша

Петров уремым да Шернур трактым вес ийын у корно уша. Йошкар-Олаште Петров уремым кугемдат. Воин-Интернационалист гыч Шернур тракт марте у корно лиеш. Тиде пашам вес ийын мучашлышаш улыт. Регион вуйлатыше А.Евтифеевын кӱштымашыже дене, тудым Марий Элын социал-экономике вияҥмаш программышке пуртеныт, тидлан 330 миллион теҥгем ойыреныт. Ик километр кужытышто йӱр вӱд йогымо канализацийым, теплоценраль, вӱд пучым ыштат. Тидын дене пырля тротуар-влакымат тӧрлышаш улыт. Подрядчик пашам телымат ышташ тӱҥалеш. Асфальтым вес ийын шарышаш улыт. Таче кечын Сомбатхей микрорайон вияҥеш, тушто у пӧрт-влакым нӧлтат, у йочасадым чоҥат, тидланак кӧра корным ыштыме йодышымат рашемдат.