Аван кечыже вашеш «Авамлан серыш»

Аван кечыже вашеш «Авамлан серыш». Марий тӱвыра рӱдер ден «Саскавий» ӱдырамаш ушем «Авамлан серыш» конкурсым увертареныт. Тений тудо кокымшо гана лиеш. Но пандемийлан кӧра форматше вашталтын. Чумыр проект «Авам дене пырля» маналтеш. Лачак тыгай лӱман конкурс 2018 ийыште лийын. Тунам мероприятийыш 6 еш ушнен. Нуно сӱретленыт, кочкышым ямдыленыт, мурымо да куштымо усталыкыштым ончыктеныт. А тений организатор-влак ава нерген сочиненийым возаш темлат. Тудым руш але марий йылме дене возаш лиеш. Конкурсышко 9 ияш гыч тӱҥалын кажне кумылан еҥ ушнен кертеш. Сеҥыше-влакым участникын ийготшым шотыш налын ойыраш тӱҥалыт. Йодмашым 18 ноябрь марте Марий тӱвыра рӱдерын электрон почтышкыжо колтыман. «Авамлан серыш» усталык шӱлышан таҥасымаш еш кокласе вашкылым, йӱлам пеҥгыдемдаш виктаралтын. Тыгак участникын мутвундо поянлыкшым да уш-акылжым пойдараш ышталтын. 

Аван кечыжым Российыште 1998 ий годсек официально пайремлат. Тунамак тиде пайремым ноябрь тылзын пытартыш рушарнянже эртараш ойым ыштеныт. Тыге, тений аван кечыжым 29 ноябрьыште палемдаш тӱҥалына.