Йошкар-Олан мэрийыштыже рӱдолам У ийлан сылнештарыме нерген йодышым каҥашеныт.
Мэрын пашажым жаплан шуктышо Антон Трудинов бизнес еҥ-влак дене вашлиймашым эртарен. Тудын мутшо дене, пайрем шӱлышым оласе кучем веле огыл, тыгак кафе, офис, кевыт-влак пуртат. Нунат пайрем вашеш шке кумдыкыштым сылнештарат гын, ола эреат сылне лиеш. Тидын годым зданийлаш пурымаште, витрине, окнам сылнештарыме нерген ойленыт. Архитектур да градостроительстве виктем тений ныл концепций гыч иктыжым ойырен шке кумдыклан у ий тӱсым пурташ темла. Тиде «Красный город», «Лесная сказка», «Зимние истории», «Новогодний арт». Нунын дене мэрийын сайтыштыже палыме лияш лиеш. Кодшо ийла семынак рӱдолаште икмыняр вере кожым вераҥдат.