Марий Элыште тений шыжым грипп дечын прививкым 146 тӱжем утла еҥ шындыктен.
Республикылан 273 тӱжем дозо вакциным йоча да кугыеҥ-влаклан налыныт. Ты радамыште -«Совигрипп», «Флю-М», тыгак «Ультрикс квадри». Тидын нерген республикын тазалыкаралтыш министерствыже палдара. Роспотребнадзорын палдарымыже дене, тений «свиной грипп» манме штамм утларак шарлен кертеш. Тидын годым кодшо ий дене таҥастарымаште прививкылаште чыла штаммым вашталтыме. Регионышто илыше-влак 60% вакцинаций дене авалтышаш улыт. Специалист-влак палдарат, тидым сентябрь-ноябрьыште ыштыман. Иммунитет кок-кум арня жапыште пеҥгыдемын шуэш.