Марий Эл Виктер вуйлатышын алмаштышыже - тӱвыра министр Константин Иванов Башкортостан Республикысе Мишкан районыш – марий-влакын тӱшкан илыме кундемыш миен.
Тудо марий тӱвырам, йылмым вияҥдыше учреждений-влакын пашашт дене палыме лийын, Мишкан селасе Марий историй да тӱвыра рӱдерым ончал савырнен. Тушто интерактивный тоштер, конференц-зал, йӱкым возышо да анимаций студий-влак улыт. Константин Иванов 2-шо №-ан полилингвальный школын пашаже дене палыме лийын. Тушто кандаш полилингвальный класс пашам ышта, педагог-влак марий да англичан йылме деке йоча-влакым кумылаҥдат. Каласыман, тиде школын опытшым Шернур округысо Кукнур селасе тунемме верыште кумдан шараш палемдат.
Фото: vk.ru/mincult12