Курыкмарий кундемыште Виловат - Новый - Паратмар-Юванькино автомашина корным ыштен шуктеныт.
Тудым «Инфраструкура для жизни» нацпроект дене келшышын тӧрленыт. Подрядный организаций пашам сентябрь мучаште шуктен. Тудо жап марте тошто шартышым фреза дене кораҥденыт, у асфальтым шареныт, вӱдым колтышо пучым келыштареныт, корно тӱрым пеҥгыдемденыт. Тӧрлымӧ корнын кужытшо 4,5 километр. Тиде корно Козьмодемьянск - Большой Сундырь регионысо трассыш кум сола гыч лекташ полша. Нацпроектым шуктымо жапыште Курыкмарий кундемыште 135 километр наре регионысо кӱкшытан корным тӧрленыт.