Звенигово районышто нацпроект почеш корным олмыктымо паша мучашке лишемеш.
Тений «Инфраструктура для жизни»нацпроект дене 16 километр корным тӧрленыт. Регионысо 10 километр утла трассым пашаш колтымо. Нунын коклаште - Кокшайск селашке пурымо корно, Исменцы - Лесная корно да Какшамарий ялыш пурымаш. Звенигово оласе уремлаште пашам тӱрыс мучашлыме. Садовая ден Охотин уремлам, чумыржо 3 километр наре кужытым, шотыш конденыт. Кызытеш специалист-влак 3,4 километр кужытан Ташнур - Янашбеляк корнышто пашам мучашлат. Тиде участкын ойыртемже: тудо кок тӱрлӧ шартышан-шаргӱан да асфальтобетонан. Олмыктымо пашам улшо леведыш типым мучко арален кодымо дене ыштыме.
Палемдена: Звенигово районышто национальный проект-влакым илышыш пуртымо чыла ий жапыште региональный значениян 157 километр утла корным нормативлан келыштареныт