Йошкар-Олаште доброволец-влакын штабышт уэш пашам ышташ тӱҥалын

Коронавирус дене черланыше-влак шукеммылан кӧра, волонтер-влакын пашашт поснак йодмашан. Йошкар-Олаште доброволец-влакын штабышт уэш пашам ышташ тӱҥалын. «Мы вместе» российысе акцийышке ушнен, волонтер-влак илалше еҥ, тазалык дене эмганыше, шагал парышан да шуко шочшан еш-влаклан полшат. Нуно кочкышым, эмым кондаш ямде улыт, тыгак сурт кӧргыштат полшен кертыт. Ушештарена, волонтер-влак пандемий тӱҥалмеке, моткоч чот тыршеныт. Шошым нунын деке ик тӱжем утла йодмаш пурен. Кеҥежым йодмаш дене лекше-влакын чотышт шагалемын. Волонтер-влакын полышыштым  шокшо линийышке йыҥгыртен, йодаш лиеш. Номер - 8-800-200-34-11. Чыла волонтер маске, перчатке дене толеш, антисептик дене пайдалана, тыгак кажне кечын нуно инструктажым эртат.