Республикысе сӱрет сымыктыш тоштерыште Алевтина Шайдуллинан ончерже почылтеш
13:45, 3-12-2020. Разместил: zhannk
8 декабрььыште Республикысе сӱрет сымыктыш тоштерыште Алевтина Шайдуллинан ончерже почылтеш. Тудлан «Расскажите, птицы…» лӱмым пуэныт. Экспозицийышке тӱрлӧ жапыште да тӱрлӧ материал гыч ямдылыме паша-влакым луктыт. Нуным ик теме уша – кайык-влак. Алевтина Шайдуллина тиде образым чӱчкыдын кучылтеш. Мутлан, пейзажышке кайыкым пурта але тудым курчакысе вургемын тӱрыштыжӧ ужаш лиеш. Кидмастар тӱрлӧ жанрыште пашам ышта – графике, пластике, но утларакше тудым керамикыш сӱретлыше семын палена. Икымше художественный шинчымашым Алевтина Шайдуллина Йошкар-Оласе музыкально-художественный интернатыште налын. Вара Моско воктенысе Абрамцевский художественно-промышленный училищыште тунемын.
Вернуться назад