Россий Правительстве Председатель Татьяна Голикова 3 гыч 7 ияш марте йоча-влаклан пособийым ойырымо нерген совещанийыште каҥашымашым эртарен

Россий Правительстве Председатель Татьяна Голикова 3 гыч 7 ияш марте йоча-влаклан пособийым ойырымо нерген совещанийыште каҥашымашым эртарен. Тушко регион вуйлатыше А.Евстифеев ушнен. Владимир Путинын кӱштымашыже дене, ешыште кажне еҥлан шотлымаште парыш- илен лекташ ситыше кугыт дечын изирак гын, нунылан социал выплатым пуат. Таче кечын республикыште илен лекташ ситыше кугыт 9830 теҥге. Ешыште икмыняр йоча гын, пособийым кажныжлан пуат. Выплате илен лекташ ситыше кугытын пелыже лиеш, Марий Элыште тиде 5033 теҥге. Тудым 1 январь гыч пуат. 2020 ий 1 январьлан йочалан 3 ий темын гын, тудлан тений вич тылзылан пособийым пуат. Январь гыч июнь марте йочалан 8 ий темын гын, 1 январь гыч 8 ийым темымешкыже выплатым шотлен пуат. Республикысе социал аралтыш органлаште республикыште учетышто шагал парышан 19 тӱжем утла еш шотлалтеш, тушто 24 тӱжем утла икшыве кушкеш.   3 гыч 7 ияш марте йоча-влаклан выплатылан йодмашым «Госуслуги» портал гоч электрон йӧн дене пуаш лиеш. Кӧн личный кабинетше уке гын, МФЦ але социал органлаште йодмашым налыт. Июнь тӱҥалтышлан республикыште «Госуслуги» портал гыч тиде пособийлан 10 тӱжемат 740 йодмашым пуэныт. Ешарен каласена, социал аралтыш орган-влак тиде пособийлан йодмашым пуышо-влаклан счетышкышт оксам колташ тӱҥалыныт.