Йӱклымаш годым шкалан келшыше йӧным ойыраш
14:59, 13-05-2021. Разместил: zhannk
Лишыл жапыште республикыште илыше-влак сайлымаш участкыште веле огыл, тыгак дистанционно йӱклен кертыт. Икмыняр регионышто удаленно йӱклымӧ шотышто тестирований тӱҥалын. Нунын радамыште Марий Эл. Мемнан республикыште тестированийышке 18 тӱжем наре еҥ ушна. Россий кӱкшытан тестирований жапыште йӱклымашын чыла этапшым эртарат: участник-влакын регистраций гыч тӱҥалын, йӱкым шотлымо марте. Тыге , «Выборы» кугыжаныш автоматизироватлыме системын ямде улмыжым тергат. Весымат палемдыман, 19 сентябрьыште, Марий Элыште йӱклымаш ончычсо семынак, сайлымаш участкышке миен, эрташ тӱҥалеш. 19 сентябрьыште республикыште кандашымше созыв Россий Кугыжаныш Думын депутатше-влакым, тыгак Марий Эл Кугыжаныш Погынышко кок депутатым сайлымаш эрта, тиде Рӱдӧ да Оршанка ик мандатан округлаште, тыгак Йошкар-Ола оласе погынышко кок депутатым сайлымаш лиеш: Набережный да Новозаречный округлаште. Сайлымаш вашеш республикыште йӱклымашлан ямдылалтым эскерыме шотышто мер пашаеҥ-влакын штабышт почылтын.
Вернуться назад