Пугачев тумо элын тӱҥ пушеҥгыже лийын кертеш
15:00, 13-05-2021. Разместил: zhannk
Пугачев тумо элын тӱҥ пушеҥгыже лийын кертеш. Российыште тидын шотышто йӱклымаш тӱҥалын. Тидын нерген «Пушеҥге – пӱртӱсын илыше памятникше» российысе программын порталже увертара. Мемнан элыште илыше-влак шке йӱкыштым 2021 ий 1 август марте пуэн кертыт. Чылаже конкурсышто тӱрлӧ регионла гыч 47 участник уло. Тидын радамыште Марий Эл гыч Пугачев тумо. Тиде пушеҥге Волжский районышто верланен. Легенде дене келшышын, тудын воктене Емельян Пугачев канен. Пушенге 26 метр кӱкшытан, лопкытшо 1 метр утларак. Шымлымашым эртарыме дечын вара пале лийын, пушеҥге 1600 ийыште кушкаш тӱҥалын. Кажне ийын Пугачев тумын сылнылыкшым ончаш ятыр еҥ, турист толеш.
Вернуться назад