Йошкар-Олаште рӱдӧ паркыште тӱзатыме пашам тӱҥалыныт

Йошкар-Олаште рӱдӧ паркыште тӱзатыме пашам тӱҥалыныт. «Оласе йӧнан средам ыштымаш» федерал проект дене келшышын паркын кечывалвел-касвел ужашыжым шотышко кондат. Тушто спорт площадкым келыштарат, корнышко асфальтым шарат, теҥгыл да урно-влакым вераҥдат. Тачысе кечын подрядный организаций пашам тӱҥалын, тидлан кӧра, Пушкин урем могырышко тротуарыште жаплан кошташ чарыме. Ешарен кодаш лиеш, 12.gorodsreda.ru сайтыште 2022 ийыште тӱзатышаш кундем-влакым ойырат. Тачысе кечын рӱдӧ олаште илыше-влак гыч утларак еҥ Какшан сер, Прохоров уремыште йолешке-влакын коштмо верышт да Россий Армий тӱвыра полат воктенсе кумдыкым тӱзатыме верч шке йӱкшым пуэн. Проект дене келшышын 30 май марте йӱклымашке лукмо19 вер гыч ойыраш лиеш.