Марий филармонийым умбакыже ыштат

Марий филармонийым палемдыме гыч 33 процентлан ыштен шуктеныт. Таче тушто электропроводкым ыштат, пырдыжышышке штукатуркым ыштеныт, канализаций да вентиляций системын проектшым ыштеныт. Марий филармоний кузе чоҥалтеш, регион вуйлатыше А.Евстифеев верышке лектын, терген. Чоҥымо площадкыште коронавирусын профилактикыже шукталтеш. Зданийышке пурымо дечын ончыч выездной совещанийышке толшо-влакын кидыштым дезинфицироватленыт, температурым висеныт. Регион вуйлатыше ончычак вестибюль, филармонийын тӱҥ сценыжым ончалын. Монтаж паша график дене шукталтеш. Марий филармонийым 2014 ийыште республикысе бюджет кӱшеш ышташ тӱҥалыныт, но окса чӱдылан кӧра, пашам чареныт. Регион вуйлатыше А.Евстифеев ик гана веле огыл объектым ыштыме йодышым Федераций Советыште, республикын 100 ийжылан ямдылалтме оркомитетыште нӧлталын. Тыге Российын тӱвыра министерствыже кужу жап чоҥымо объектым «Культура» национальный проектышке пуртен, 2020-2021 ийлаште софинансирований дене федерал бюджет гыч тудым ышташ шийвундо ойыралтеш.