19:50, 26-05-2021«Марий Эл ТВ»: В Марий Эл проходит конкурс «Этноблогер года»

Марий Элыште «Идалыкын этноблогерже» Россий кÿкшытан премийлан конкурсым увертареныт. Тений тудо кокымшо гана лиеш. Тушко элнан кеч-могай регионыштыжо илыше этноблогер, мер пашаеҥ ушнен кертеш. Постым кеч-могай йылме ден возаш лиеш, но конкурсыш йодмаш пелен текстын рушлашке кусарыме вариантшым колтыман. Премий верч таҥасыше-влакым 4 номинаций дене палемдаш тÿҥалыт. «Идалыкын этноблогерже»,  «Идалыкын постшо», «Идалыкын блогшо» да «Эн самырык этноблогер». Тÿҥ условий - 1 январь гыч 10 июнь марте участник шочмо йылме, тÿвыра, йÿла, этнотуризм, этномода теме дене 10 постым возышаш. Ойыртемалтше-влаклан кубокым да пöлекым кучыктат.