Шыже – тиде телылан ямдылалтме пагыт. У Торъял районысо «Первый май» колхозышто кызытат паша шолеш манаш лиеш. Шыжым кеҥежым погымо пырчым перерабатыватлаш, эрыкташ, вес шурно лектыш марте арален кодаш кӱлеш. Тений кукшо игечыла кӧра, шурно лектыш моло ийла дене таҥастарымаште, начаррак. Туге гынат «Первый май» колхозын председательже Аркадий Новиковын палемдымыж почеш, пырчан шурно шке ялозанлыкланат сита да ӧрдыжкат ужалаш кодеш. Палемдыман, тений ты колхозышто вольыкын чотшо ешаралтын.