Марий кечышот дене – тений шурмаҥшын идалыкше. Акрет жапыште кугезына-влак марий У ийым шошым вашлийыныт. Шагал еҥ пала: марий калыкын шке кечышотшо уло. 22 март деч вара у ий, у кечышот тӱҥалеш. Тудын дене келшышын, 2024 ий – йӱксо идалык лийын, тений тудым шурмаҥше алмаштен. Республикысе Марий тӱвыра рӱдер Шернур район Кукнур селаште Марий Йӱштӧ Кугызан илемыштыже марий калыкын кече ден йӱд иктӧр шогымо татым пайремлыме йӱла радамым ончыктен.