Йошкар-Олаште «Мыйын еш архивем» конкурсын оласе этапшым иктешленыт. Тушко Марий Элын рӱдолаштыже илыше 16 еш ушнен. Ача-ава, йоча, кова ден коча-влак Кугу ачамланде сарыште элнан эрыкше верч кучедалше родо-тукымыштым шарналтеныт. Нунын дене кылдалтше материалым шымленыт да чыла чумырен конкурсыш темленыт. Тений «Мыйын еш архивем» кум номинацийыште эрта: «фото шарнымаш», «Шарныктыш книга» да «Еш тоштер». Пытартышыже – ик эн оҥай, палемдат организатор-шамыч. Ты виктышыште конкурсант-влак тичмаш ончерым чумыреныт. Тушто шке талешке дене кылдалтше ятыр материалым: медальым, документым, сар гыч возымо серышым да молымат погеныт.