Шочмо эл ончылно порысым шуктышыла вуйым пыштыше выпускникым порын шарнен. Советский районысо Ӱшнӱр кыдалаш школышто Специальный сарзе операцийын участникше Александр Куклинлан мемориал оҥам да Геройын партыжым почыныт. Александр Куклин СВО-ш 2022 ий октябрьыште мобилизаций радамыште каен. 2024 ий 28 февральыште заданийым шуктышыла Луганск кундемыште ӱмыржӧ кӱрылытын. Лӱддымылыкым да геройлыкым ончыктымыжлан колымекыже Патырлык орден дене палемдалтын. Шарнымаш мероприятийыш боецын ешыже, родо-тукымжо, пырля тунемше йолташыже да туныктышо-влак чумыргеныт. Самырык герой чолга, муткучышан да поро рвезе семын шарналт кодын.