Санкт-Петербург олаште да Ленинград кундемыште илыше марий-влак тений Пеледыш пайремым эн ончыч пайремлат. 24 майыште тиде кундемыште илыше марий-влакын «Ший корно» автономийышт чыла кумылан-влаклан кугу пайремым эртара. Тиде йӱлам ынде 12 ий шуктат. 2018 ийыште «Пеледыш пайрем» Ленинград кундемыште эртаралтше чыла пайрем коклаште «Бренд» статусым налын. Тений пайремыште Пошкырт кундемысе «Эрвел марий сем» гармоньчо ансамбль, Всеволожск ола гыч «Надежда» хореографий коллектив, Козьмодемьянск ола гыч «Мистерия танца» куштышо студий да верысе усталык коллектив-влак выступатлат.