Йоча-влакым шуарыме шотышто директор-влакын советникышт эртыше идалыкым иктешленыт. Йошкар-Олаште педагог-влакын кугу форумышт эртен. Тудо уло Марий Эл гыч 200 наре специалистым чумырен. Советник-влак шке опытышт дене палдареныт, эн сай проектышт нерген каласкаленыт. Шке докладлаштышт педагог-влак школысо да сузысо тоштер да театр-влак нерген мутым нӧлталыныт. Кузе нуно ӱдыр-рвезе-влакын патриотизм шӱлышыштым вияҥден шогат, ойленыт. Тидын деч посна тунемше-влакын социал чолгалыкыштым пеҥгыдемдыме шотыштат ой-каҥаш-влак йоҥгалтыныт.