Шернур районышто волонтёр-влак специальный военный операций тӱҥалме икымше кечылаж гычак воин-влаклан полшат. Нуно маскироватлыме сетьым пидыт, окоп сортам ыштат, гуманитар полышым погат. Волонтёр-влакын пашаштым «Труженики тыла» ушем виктарен шога. Тыгак районышто Ачамландым аралыше сарзе еш комитетын штабше пашам ышта. Поро пашашке шке кумылын утларакше «ший ийготан» волонтёр-влак ушнат. Мыняр сетьым пидме, окоп сортам пелтыме да мыняр тонн гуманитар полышым погымо – шотлен пытараш огеш лий.