Пеледыш пайрем шукертак вучымо верыште. Тений марий калыкын ик эн йӧратыме пайремже Марий паркыште эртаралтеш. Кызыт тудым кугу пайремлан ямдылат. Паркыште шудым солат, район-влакын стендышт воктене шатерым вераҥденыт. Пеледыш пайрем кечын тушто кажне кундемын шке «Кудыжо» лиеш. «Йоҥалт, чаплане, Пеледыш пайрем» программе 12 шагатлан паркын кугу сценыштыже почылтеш. Палемдыман, тудын ончылно куштымо верыш асфальтым шареныт. Пеледыш пайремыш Российын тӱрлӧ кундемлаж гыч уна-влак чумыргат.