Курыкмарий драме театрыште у постановко-влакым чӱчкыдын шындат. Репертуарыште тачысе илыш дене кылдалтше, йоча да кугырак-влаклан келшыше спектакль-влакат улыт. Нунын деч посна, тӱрлӧ концерт программе денат верысе калыкым куандарат. Кызыт Курыкмарий драме театрын режиссёржо, Марий Элын сулло артистше Ольга Искоскинан бенефисшылан ямдылалтыт. Шукерте огыл Ольга Лазаревна шкенжын шӧртньӧ юбилейжым палемден. Тудо Курыкмарий драме театрышке 1994-ше ийыштак толын. Театрын шочмыж гычак, пашам ышта. Артист семынат тырша. Пытартыш 12 ий – театрын тӱҥ режиссёржо.