Курыкмарий районышто Мумарихӓ ял воктене ожно Спасо-Юнгинский монастырь верланен улмаш. Археолог, шанчыеҥ-влакын ойышт почеш, тудым 400 ий ончыч чоҥеныт. Тудо верыште кызыт нимат кодын огыл. Тений август мучаште тыште Тимофей Евсеев лӱмеш калыкле тоштерын археологий пӧлкажын пашаеҥже-влак кӱнчымашым тӱҥалыныт. Тиде сомылым нуно Валериан Васильев лӱмеш Марий шанче шымлыше институт дене пырля пашам ыштыме нерген ойпидыш почеш шуктат.